Tuesday, August 25, 2015

Gidaginot sa Bureau of Custom ang Hinaguan sa mga Migrante

Nakapakugang sa mga Overseas Filipino Workers ang bag-ong polisiya sa Bureau of Custom kun BOC nga ablihan ang ilang mga balikbayan boxes. Naanugnan ang BOC sa nawagtang nga buhis nga mokabat sa P50 milyunes matag bulan o P600 milyunes matag tuig sa smuggling pinaagi sa mao nga agianan o channel.

Apan kung tan-awon nato sa mas lapad nga perspektiba gamay ra kaayo kini nga kantidad kumpara sa gi-smuggled nga mga produkto nga mukabat sa $20 bilyunes hangtud $24 bilyunes matag tuig subay sa datus mismo sa gobyerno. Bisan kung gipasabot pa sa BOC ang ilang maayo nga katuyuan sa istrikto nga pagpatuman sa ilang polisiya dili ikalimod nga daghan ang nagduda sa ilang tumong. Kadaghanan sa mga OFW supak sa mao nga polisiya ug nipadayag sa ilang kalagot sa mao nga ahensya ug lakip si Presidente Aquino ang ilang gipahimungtan.Ilang gidudahan ang administrasyon nga nagtigum na aron gastuhon alang sa kampanya sa Liberal Party sa 2016.

Matud pa sa mga pagsaway nga gidaginot sa BOC ang mga balikbayan boxes kay gidudahan nga nagamit sa mga peke nga consignee aron makasulod sa nasud ang mga produkto nga walay buhis. Apan ang suligwaot paminawon wala mapakgang sa BOC ang dagkong mga containers ug smuggled luxury cars nga padayon nakasulod sa nasud nga niagi mismo sa atubangan custom.

Mao nga sa akong panahom nga dili usab maayo nga samtang nag-istrikto ang custom sa mga OFW apan ang tinunilada nga mga basura ug smuggled nga kontrabando hapsay ra nga makasulod sa nasud. Tukma ang obserbasyon sa mga magbabalaod sa Makabayan Bloc nga mas maayo nga tutukan sa BOC ang paglimpyo sa ilang han-ay sa korapsyon ug paggukod sa mga big-time smugglers kaysa padayon nga lisud-lisuron ang mga OFW ug pamilya niini.

Dili na kinahanglan pa nga ablihan ang mga balikbayan boxes arun masiguro nga wala’y iligal nga mga item. Bastante na nga kini ipaagi sa X-ray machines aron makit-an ang sulod sa mga pasalubong boxes. Kung magpadayon kini’ng pagpatuman sa bag-o nga polisiya, bulnerable kini sa korapsyon. Dili nato kalimtan nga sukad pa niadto daghan na nga mga reklamo ang gipaabot sa mga OFW kabahin sa ilang mga pasalubong boxes nga nawagtangan sa mga mahalon nga items, samot na kung ablihan pa, basin matintal unya.

Monday, August 24, 2015

Neri Colmenares ang Senador sa mga Kabus

Nakulit na sa kasaysayan nga kadaghanan sa mga mapili sa taas nga posisyon sa pangagamhahan mao ang mga ilado nga pamilya. Sukad 2010 ubay-ubay na ang paningkangmot sa lain-lain'g hut-ong sa katilingban nga mobutang og mga senador nga tinuod mo-alagad sa mga kabus apan napakyas. Apan bisan paman sa mao nga kasinatian, dili gayud ikalimod nga nagsyagit ang panginahanglan alang sa tiunay nga tingug sa mga kabus diha sa hawanan sa Senado.

Wala ako'y duda sa kapasidad ni Neri Colmenares nga kasamtangan'g kongresista sa Bayan Muna Party-list. Kung track record lang ang hisgutan, dili ikalimod ang signipikante nga nabuhat nga kaayuhan ni Colmenares. Sa wala pa siya mahimo'ng abogado, gihimugso siya sa pakigbisog panahon sa kangitngit sa Balaod-Militar ni kanhi Presidente Ferdinand Marcos.Tungod sa iyang paglaban sa mga hut-ong kabus sa Negros usa siya sa mga biktima sa kamot nga puthaw sa diktadorya, nahimo siya'ng usa sa mga politikanhon'g binilanggo.

Sa diha'ng abogado na si Colmenares iyang gipahimug-atan ang paglaban sa mga pobre. Hangtud nga nahimo siya'ng usa mga mga kongresista sa Bayan Muna ug nakalingkod sulod sa tulo ka termino. Isip kongresista gipakita ni Colmenares kuyog sa iyang mga kauban sa Makabayan Bloc diha sa Kongreso ang kaligdong ug kridibilidad nga wala'y bahid sa pagpangawkaw ug korapsyon taliwala sa pagpanggukod sa administrasyon. Daghan usab nga mga mahinungdanon nga balad-udnon ang nahimo ni Colmenares ug ang mas labing bag-o mao ang pagpa-usbaw sa binulan nga pension sa atong mga SSS pensioners.

Karon nga pormal na nga gi-endosar sa mga Negrense si Colmenares nakakita ko sa bintaha sa iyang kampanya sa umaabot. Lakip sa positibo mao ang pamahayag mismo sa aktres nga si Angel Locsin aron i-endorsar ang kampanya sa iyang uyuan nga si Colmenares sa pagkasenador.Kung hisgutanan sa makinarya, dili ikalimod nga lukop-nasud ang membro ug simpataysir sa Makabayan Bloc ug Bayan. Gani, sa tanan nga bag-ong ngalan aron molansad pagkasenador mas makapangangkon si Colmenares nga limpyo ug wala'y bahid sa kahugaw ang iyang pagkatawo ug kridibilidad kumpara sa uban.

Kung gusto kita nga aduna'y mga mapanday nga balaudnon nga pabor sa katawhan'g kabus diha sa Senado, nagkinahanglan kita og usa ka Neri Colmenares nga nasubhan na sa pagdapig kanato.Nakasuway na kita sa mga ilado ug "kunuha'y maayong laki" apan napakyas sa paglaban kanato kay gi-una ang ilang tagsa-tagsa ka interes sa ekonomiya ug politika. Taga-an nato'g higayon nga ang sama ni Neri Colmenares makapamatuod sa iyang kinasing-kasing nga tinguha sa pag-alagad kanato isip senador sugod karon'g 2016.

Tuesday, December 9, 2008

Maigo sa Grabeng Krisis ang Pilipinas

Gisulayan sa rehimeng US-Arroyo nga pagawasong dili apektado ang Pilipinas sa pangkalibutanong krisis sa pinansya ug ekonomiya ug anaa sa maayong kahimtang ang nasud aron pangibabawan ang krisis. Nangayugpos sa kangit-ngit ang rehimeng US-Arroyo.

Una sa tanan, nakalitan ang kadaghanan nga adunay diay pila ka gatus ka milyong dolyar nga investment ang mga lokal nga bangko sa nabangkaroteng Lehman Brothers ug ang PhilAm Life nga gipanagiya sa American International Group nga nabangkarote na unta kung wala pa gisalba sa gubyernong U.S. pinaagi sa $140 bilyung puhunan ug pautang. Wala kaayo mahibaw-i sa publiko nga sumala sa Bangko Sentral, nga may aduna pay dako nga kwarta o balor sa invesment sa mga lokal nga bangko sa uban pang instrumentong pinansyal sama sa credit default swaps nga giila karong “ toxic assets.”

Ikaduha, nakasandig pa gihapon ang pangnasudnong ekonomiya sa pag-eksport sa U.S.,Japan ug uban pang kapitalistang nasud nga sa kasamtangan anaa na sa resesyon butang mga magpagamay sa import niini nga mga nasud. Dili maasahan ang China isip alternatibong merkado sa atong export, tungod kini usab apektado sa resesyon sa mga nangunang merkado niini- US, Japan ug EU. Nag-iban sa mga mamumuo ang mga pabrika sa China kung dili man sirad-an ang mga pabrika.

Ikatulo, apektado usab sa resesyon sa mga kapitalistang nasud ang mga langyaw'ng pamuhunan sa Pilipinas. Dako ang naiban sa speculative capital nga nagbuhi sa lokal nga stock exchange ug money market.Adunay mga call centers nga nanirado o nag-iban sa ilang mga empleyado.

Ikaupat, direktang apektado sa resesyon sa kalibutan an trabaho sa mga mamumuong Pilipino sa gawas sa nasud. Nga sa una pa nakaiban na sa ihap sa mga Pilipinong walay trabaho. Daghan sa mga seamen ang wala na nakabalik sa ilang mga barkong gitrabhuan tungod sa paghinay sa pangkalibutanong shipping industry tungod sa paghinay sa negosyo. Nihinay usab ang industriya sa konstruksyon sa sentrong sidlakan, ilabi pa sa Gulf States, tungod sa pagkauga sa pautang. Apektado niini ang remittances sa mga Pilipino sa langyaw'ng nasud nga maoy gisaligan sa lokal nga ekonomiya ug pagbayad sa depisit sa balanse sa bayranan ug pagbayad sa langyaw'ng utang.

Ikalima, mismong ang mga lokal nga dagkong burgesya komprador nga lakip sa Makati Business Club ang nagpadayag nga mabatyagan sa Pilipinas ang “resesyon” sa musunod tuig.

Samtang, nibalik sa pagkuyog ang balanse sa negosyo ug balanse sa bayranan. Niubos ang binayluay sa piso batok dolyar. Nagplano ang gubyernong Arroyo sa bag-ong pangutang aron pun-an ang mga depisit sa bayranan ug gastos sa gubyerno. Gipangabre sa kawalay trabaho ang kakabus.

Nagpabiling grabe ang kahimulag ni Gloria Arroyo sa katawhan. Padayon nga nalantad ang panglimbong ug pangawkaw niya sa pundo sa kaban sa katawhan aron makadaog sa niaging eleksyon niadtong 2004. Nalantad ang uban pang grabeng kaso sa korupson ug kahiwian sa gubyerno ug PNP.

Gikuyawan ang grupong Arroyo niadtong nilabay'ng Pebrero sa pagbuksas niJun Lozada sa kahiwian sa proyektong ZTE broadband nga nalambigitan sa mag-asawang Aroyo ug pagpakusog sa mga nagkadagkong aksyong protesta sa sulod sa hamubong panahon.

Gikasuko sa katawhan ang padayong pagpataw sa EVAT ug uban pang buhis nga nakaiban sa gamay nang daan nga kita sa katawhan ug ang garapal nga paggamit sa pondo gikan sa EVAT alang sa pakitang tawo nga pagtabang sa mga kabus. Gikasuko sa katawhan ang kawalay-aksyon sa gubyeno sa dili makatarungang pagtaas sa presyo sa gasolina ug kulang nga pag-us-os sa presyo niini sa dihang nagsugod sa pag-ubos ang presyo sa lana sa pangkalibutanong merkado.

Desidido si Aroyo nga magpabilin sa gahm bisan pa lampas sa tuig 2010. Gipaduso niya ang pagpalagpot kang Jose de Venecia isip speaker sa ubos nga kapulunngan sa kongreso aron maseguro nga dili kini magamit sa oposisyon sa bisan unsa mang lakang aron malagpot sa pwesto ang pangulo. Karon gipaduso sa usa sa mga anak ug mga tinyente sa ubos nga kapulungan ang Charter Change pinaagi sa constituent assembly nga adunay bug-at ug kusog nga pasidaan sa Senado nga ipadayon nila ang asembliya bisan wala ang mga senador.

Mapakusog ni Arroyo ang kontrol niini sa senado human nga napalagpot si Villar isip presidente sa Senado ug gipuli kaniya si Enrile sa tabang pa sa mga elemento sa oposisyon nga nakig-alyansa sa mga senador nga pro-Aroyo.

Balik nga gipakaylap sa rehimeng Aroyo ang pagpamig-ot sa progresibong kalihukan. Balik nga nagkadaghan ang mga pagpamatay sa mga aktibista. Adunay 42 na ang natala nga gipatay sa tuig 2008, subra sa 20 niini nahitabo sa Southern Mindanao Region. Kabahin sa Legal nga opinsiba sa rehimen, dinaghan nga gisang-atan sa mga kaso ug pagpanabotahe ang 72 aktibist sa Southern Luzon. Giapil usab sa kaso ang usa ka labor lawyer.

Gipasagdan ug ginatabangan sa rehimeng Aoyo ang direktang pagpanghilabot sa U.S. Sa Mindanao. Wala na mawad-an sa mga tropang Amerikano sa Mindanao human sa pagsugod sa serye sa mga joint miltary exercises niadtong 2002. Naglusad sa mga poyektong sosyo-ekonomiko ang U.S. AID sa mga lugar sa katawhan Moro.#

Kalibutanong Krisis sa Ekonomiya Nagkagrabe

Nagpadayon ang paggrabe sa krisis sa pinansya ug ekonomiya sa pangkalibutanong sistimang kapitalista nga giilang pinakagrabe sukad niadtong GREAT Depression sa dekada 1930. Taliwa sa trilyon-trilyong dolyar nga gipabaha sa gubyernong Estados Unidos para sustinihan ang sistimang pinansyal, nilukapa pa gihapon ang Citigroup, usa sa pinakadakong bangko sa kalibutan, nga gikinahanglang sagupon sa gubyerno.

Sa pagsugod sa signos sa krisis sa pinansya niadtong Agosto 2006, gitawag kining problema lang sa mga SUBPRIME nga pautang sa pabalay (housing mortgage) na gamay nga bahin sa halos $13 trilyong ekonomiya sa Estados Unidos. Apan nihapak ang krisis sa pinansya niadtong setyembre-Oktobre sa dihang nalugi ug nabarangkote ang daghang mga bangko ug uban pang institusyong pinansyal ug nigrabe ang pag-istrikto sa pautang (credit crunch). Nalugi ug naughan sa pondo ang mga bangko tungod sa sobra kadakong utang nila dili lang sa SUBPRIME nga pautang sa pabalay, kundili lakip sa ubang instrumento sa pinansya parehas sa CREDIT DEFAULT SWAPS ug uban pang DERIVATIVES. Nahimong nigrabe ang krisis sa pinansya maong naobliga ang mga gobyerno sa Estados Unidos ug sa Europian Union nga sagupon ang mga dagkong bangkong nalugi ug gikahadlukang mabangkarote ug makapalugwa sa dakong kapital aron balik nga paagasun ang pautang ug pinugos nga iapil ang uban niini sa mas dagkong bangko. Sa kadakong kapital nga gipalugwa sa Estado, ang ubang bangko nahimong gipanag-iya sa sa gubyerno. Gibana-banang adunay $ 5 trilyunes na ang gipahulam sa gubyernong U.S. sa mga bangko ug sa mga langyaw'ng gubyerno aron ipabiling nagdagan ang pangkalibutanong sistima sa pinansyal.

Pinakagrabeng naigo sa krisis sa pinansya ang U.S., apan niigo pod kini sa uban pang mga abanteng kapitalistang nasud ug sa mga devloping countries. Naigo na pod sa krisis ang Westen europe ug Japan. Nisunod niini ang mga developing countries sama sa China,India ug Brazil. Naapil pod ang Eastern Europe ug maski ang Gulf States nga bisan adunahan sa lana apan na-enganyo sa proyektong pang-ekonomiya nga gigastuhan sa langyaw'ng pautang. Parehas sa U.S., nagbuhos usab sa bilyon-bilyong dolyar ang mga gubyerno aron sagupon ang mga naluging bangko ug sulbaron ang credit crunch.

Anaa sa luyo sa grabeng krisis sa pinanya ang tinuod nga kisis sa ekonomiya. Ang krisis sa pautang sa pabalay bunga lamang sasobrang produksyon sa mugnang mga balay nga lampas sa kakayahan ug kapasidad sa tawo nga mubayad. Dili lamang sa industriya sa pabalay ang adunay sobrang produksyon. Susama niini usab ang kahimtang sa ubang sektor sa ekonomiya, sama sa industriya sa Auto, cellular phones ug computers. Niining katapusang bahin sa 2008, nilugwa na sa mga datus sa mga gubyerno ang paghinay sa prodksyon, paghinay sa halin sa mga paninda ug pagdaghan sa mga tawong walay trabaho. Wala nahitabo sa usa lamang ka tuig ang pagdako sa surplus sa produksyon ug dili makasabay nga kakayahan sa mga konsyumedor nga paliton ang mga produkto.

Anaa na sa resesyon ang Estados Unidos, Japan ug kadgahanan sa mga nasud nga lakip sa Europian Union. Wala pay opisyal nga kompirmasyon ang gubyernong Estados Unidos nga anaa na sa reseyon ang ekonomiya, apan daghan sa mga ekonomista ug kapitalista ang nagtuong nga adunay nay reseson subay sa pag-ubos sa produksyon sa nilabay'ng duha ka quarter sa tuig 2008, pagdaghan sa mga walay trabaho (gutaktak ang 50 thousand OFWs sa USA), paggamay sa export ug import. Usa ka timailhan sa kagrabe sa krisis sa ekonomiya ang dugan sa duyog sa pag-igo sa resesyon sa U.S., Japan ug E.U. Naglunsad ang mga gubyerno og mga programa aron padasigon ug pakusgon ang produksyon.

Sa halapad nga pagkanaog sa mga presyo sa produkto ug hilaw nga mga materyales alang sa produksyon, milutaw karon ang problema sa DEFLATION- ang pag-ubos sa presyo sa daghang mga produkto ug hilaw nga materyales- nga kakaluha sa pagdyutay sa ekonomiya sa kapitalistang mga nasud. Nabalaka ang mga ekonomista nga mahitabo ang deflation nga nabatyagan sa Japan sa panahon sa grabeng resesyon niadtong tibuok dekada sa 1990.

Direktang apektado sa krisis sa mga kapitalistang nasud ang mga developing countries, apil na ang China, India ug Brazil nga parehas nga nakasandig sa export sa ilang mga produkto ug langyaw'ng kapital. Nanirado ang mga pabrika ug nag-iban ug nanaktak sa mga mamumuo ug empleyado.

Gidistrungka sa mga lakang sa mga gubyerno sa mga kapitalistang nasud ang dugay nang nanganawkanaw nga idolohiya sa gawasnong merkado (free market) ug sa patakarang pagwagtang sa kontrol sa gubyerno sa pagpadagan sa ekonomiya. Bisan pa ang mga bangkerong numero unong tigbandila sa idolohiya sa gawasnong merkado ang nangayo ug naguyupo sa dagkong tabang sa Estado aron luwason ang ilang kaugalingon ug ang tibuok sistimang pinansyal. Gipakita sa kasamtangang krisis sa pangkalibutanong sistimang kapitalista nga wala mawagtag ug dili masulbad nga natural nga krisis sa kapitalismo. Usa ka hinanaling bunga sa paggrabe sa krisis sa pinansya ug ekonomiya sa U.S. Ang pagkapilde sa Republican Party ug pagdaug ni Barack Obama sa nilabay'ng eleksyon.#

Tuesday, November 11, 2008

Napasmo na ang Katawhan

Taliwa sa grabeng maniobra, bakak ug hambog sa rehimen'g US-Arroyo nga dili apektado ug nabatyagan na sa katawhan ang asenso sa kinabuhi. Dili kuno apektado ang ekonomiya sa Pilipinas sa ekonomikanhong krisis nga miigo sa Estados Unidos. Dakong sagpa sa dagway sa Malacanan ang bag-uhay nga resulta sa World Food Survey sa Gallup International-Voice of the People 2008.
Panglima sa listahan sa nakabatyag sa grabeng kagutom nga nasud ang Pilipinas nga gipagawas niadtong Nobembre 4. Ang surbey gisalmutan sa dul-an 60 ka libo ka tawo nga gikan sa 55 ka nasud sa Asia, Africa, Latin America ug Europa niadtong hunyo ug septembre kalambigit sa paghamdom sa kalibutanong adlaw sa pagkaon.

Matud pa sa Gallup, 40% nga mga Pilipino ang nagtug-an nga permi o panagsang walay makaon o kuwang ba kaha sa pagkaon sa niaging 12 buwan. Nilugwa sa maong surbey nga pinakataas ang tantos sa kagutom didto sa Metro Manila nga diin labing menus tunga sa milyon ka mga pamilyang Pilipino ang nagpuyo nga apektado sa kagutom.
Ang mga nasud nga gi-surbey sa Gallup kun diin grabe ang kagutom mao ang 1) Cameroon, 55%; 2) Pakistan, 53%; 3) Nigeria, 48%; 4) Peru, 42%; 5) Pilipinas, 40%; 6) Bolivia, 35%; 7) Guatemala, 35%; 8) Ghana, 32%; 9) Mexico, 23%; at 10) Russia, 23%.
Mas grabe pa ang resulta sa sarbey sa Gallup ikumpara sa nakapabalaka nang resulta sa sarbey sa Social Weather Stations kun diin nilugwa nga 16.8% sa katawhang Pilipino ang nakabatyag sa kagutuman sa nakalabay nga ikatulong kwarto sa 2008.

Friday, November 7, 2008

Pilipinas dili angayan sa International Court of Justice

November 8, 2008 Ang kapakyasan sa delegado sa Pilipinas nga si Senadora Mirriam Santiago nga makakuhag lingkuranan ug mapili isip representante sa Pilipinas sa International Court of Justice nagpakita na nga nahimulag na ang Administrasyong US-Arroyo sa International Community.

Dili lilong sa katawhan sa tibuok kalibutan ang padayong pagpanghasi sa administrasyon pinaagi sa iyang pagpanggukod sa iyang mga kontra sa politika. Kuyanap pa gihapon ang pagpangpatay, pagpangdagit, tortyur ug pagpanghadlok nga nahiaguman ang mga kritiko ni Arroyo.

Gipatuman sa gobyerno ang sunson nga implementasyon sa Oplan Bantay Laya kon OBL II nga dayag nga nag-gukod sa mga ligal demokratikong grupo ug progresibong pundok sa katawhang Pilipino. Sa ingon niini walay dagway ug moral nga kaakuan ang gobyerno ni Gloria nga makakuhag pwesto sa International Court of Justice tungod kay bisan gamay wala mahatagig hustisya ang mga biktima sa pasismo sukad sa iyang pagka presedente sa nasud.

Tukma ug angayan lamang nga wala mapili ang delegado sa pilipinas sa ICJ aron makahatag og dugang hapak sa dungog sa administrayon nga dugay ng nangagusbat tungod sa lantaran korapsyon ug pasismo.

Wednesday, November 5, 2008

Hagit kang Obama: Undangon ang gubat sa Iraq ug Mindanao

November 5, 2008 Sa kadaugan nga naangkon ni Barack Obama isip labing unang itom nga napiling presidente sa Estados Unidos nakahatag kini'g dakong dungog sa mga itom nga sama niya nga nakatagamtam sa grabeng rasang diskriminasyon sa hataas nga panahon sa kasayasayan sa Estados Unidos sa America sa pagpili og pangulo.

Apan ang labing mahinungdanon mensahe sa maong makasaysayanong kadaugan mao ang esensyal nga kamatuoran nga ang kadaghanan sa mga amerikanhong katawhan “itom man o puti” wala na mahimuot sa mga polisiyang pang-ekonomiya ug pangpulitika nga gipasiugdahan sa administrasyong GEORGE BUSH (nga gikan sa Republican Party) ilabi pa ang dayag nga pagpangilog og mga teretoryo sa ngalan sa pakig-away batok terorismo.

Sa pasalig ni Obama nga papaulion na sa Estados Unidos ang mga sundalong Amerikano nga padayong nakiggubat didto sa IRAQ ug uban pang mga nasud sa tunga-tungang sidklakan. Gikinahanglan nga iya pod nga papaulion na ang mga sundalong Amerikano nga nia sa Mindanao padayong nilingla sa mga Pilipino pinaagi sa Balikatan Exercises ug Visiting forces Agreement nga ginapahigayon matag tuig.

Kini nga mga kasabutang pang militar ug polisiya nakamugna'g makuyaw nga relasyon tali sa Pilipinas ug Estados Unidos. Samtang si Obama nakahigayon sa pagdayeg sa Balikatan War Games ug sa papel sa Pilipinas sa gubat batok terorismo, mas maayong hinumduman ni Barack Obama nga kini nga mga polisiya hulga sa interes sa katawhang Pilipino. Kini nga mga polisiya kinahanglang hununong ug tapuson na ug ang uban pang mga kasabutang makaayo lamang sa usa ka habig o one-sided.

Lakip usab sa angayang tagaan ug bug-at nga pagtagad mao ang padayong US military Aid alang sa Pilipinas taliwa sa wala pa maresolbang tawhanong pagpangabuso. Ang Pilipinas wala pa makakompleto sa mga rekomendasyon sa US Rapporteur Philip Alston. Si Obama kinahanglang mokonsidera ug muhunong sa US military Aid sa pasistang rehimeng Arroyo.
Kasamtangang nagdawat ang Pilipinas og 30 milyunes dolyares nga Military Aid gikan sa US government apan aduna lamang 2 milyunes dolyares nga contingent Aid alang sa Human Rights record sa gobyerno sa Pilipinas.

Wala kita'y ilusyon nga dunay radikal nga kausaban nga mahitabo ilawom sa Administrasyong Obama, tungod kay ang batakang pang ekonomiyang relasyon nga maoy nag determinar sa politikanhong sistima wala pa mausab.

Bisan sa mga limitasyon, ang mga lihitimong demanda alang sa kausaban sa RP-US nga relasyon gikinahanglang pursigidong ipaduso. Sa pakig lobbying man sa kongreso o sa mga martsa sa parliamentaryo sa kadalanan didto sa Washington, Manila ug tibuok Pilipinas nga modemanda alang sa kausaban sa polisiya sa US dinhi sa Pilipinas bisan dakong supak pa sa kabubut-on sa bag-ong presidente sa Estados Unidos.