Pagbutar alang sa CHA-CHA dili na kinahanglan

August 26, 2008 Karon adlawa butuhan diha sa Committee on Constitutional Amendments sa Lower House ang hisgutan sa posibleng kausaban sa atong batakang balaod.

Alang namu dili na unta angayan ug wala nay igong rason nga mag butuhay pa alang sa cha cha o charter change sa pagkakaron, tungod kay baga na ang kabatan-unan ug katawhang Pilipino ang nisupak niini.

Nganung kinahanglan paman butuhan ang cha-cha nga sayud man kita nga daghan sa katawhan lakip ang kabatan-unan ang supak? Nganung dali-dalion paman ang cha-cha nga sayud man kita nga ang senado supak man niini?

Ang mga alipures ni Arroyo diha sa kongreso kusganong nagpaduso sa isyu sa cha-cha alang sa kasulbaran sa krisis nga nahiaguman sa katawhan. Kini usa ka desperadong lakang o pamatuod sa ilang pagka kinwanggol nga paghimo og sulosyon sa krisis.

Ang ANAKBAYAN Cebu hugtanon nga nagsupak sa bisan unsa nga mga lakang nga nagtumong alang cha cha o pag-usab sa batakang balaod, tungod naghatag kinig bulnerabilidad ug kakuyaw alang sa ekstensyon sa termino sa bakakong rehimen ni Gloria Arroyo. Adunay mga probisyon sa atong konstitusyon nga nagprotekta pa sa interes sa katawhan nga kung dunay cha cha dako ang kahigayunan nga wagtangon kini.

Ato pod nga makit-an ang maniobra sa mga alipures ni Arroyo pinaagi sa pag convene sa Constituents Assembly nga mobutar isip usa sa kongreso ug senado, kini nga lakang makahiktin o maka marginalize sa senado tungod sa kadaghan sa ihap sa mga membro sa ubos balay balauranan o lower house.

Ma-aduna o walay Memorandum of Agreement on Ancestral Domain sa game-plan ni Mrs. Arroyo permaninteng mulugwa ang hisgutan sa charter change. Ang MOA maoy gihimong entry point alang sa cha-cha nga maoy kinaham sa Rehimeng Gloria isip ilang malahutayong interes.

Ang Malacanang kasamtangang namahayag nga dili na nila pirmahan ang MOA sa kasamtangang porma ug posibleng i-review o mag negosasyon pag-usab pinaagi sa Korte Suprema nga Restraining order.

Magpabilin kitang magmatngon sa mga maniobra kay ang itom nga laraw ug intensyon alang sa cha-cha wala pa mamatay. Ato gipahinumduman ang atong mga magbabalaud nga ang self serving nga charter change makasugat sa lig-ong pagsupak sa kabatan-unan ug katawhan.#